Олтиариқ туман прокурори Р.Тиллаев, туман ҳокими ва Азимобод МФЙ раиси ташаббускорлигида 26-умумтаълим мактабига янги бино қуриб, фойдаланишга топширилди. Замонавий архитектура ечимига эга бўлган, 480 ўринли мактаб қурилишида элликдан ортиқ фермер хўжаликлари, пахтачилик кластери ҳамда кўплаб тадбиркорлар ва маҳалла аҳли фаол иштирок этдилар. Дастлаб, вилоят ҳокими Х.Бозоров томонидан ажратилган 500 миллион сўм маблағ ва вилоят раҳбарининг қўллаб-қувватлаши туртки бўлиб, ҳомийлик асосида 10,5 миллиярд сўм маблағ сарфланиб қисқа муддатда салобатли илм маскани барпо этилди. Мактабнинг очилиши бугунги Қурбон ҳайити арафасида чинакам совға бўлди. Вилоят ҳокими бошчилигида бир қатор бошқарма ва идоралар раҳбаралари, фаоллар, нуронийлар ва ёшлар, педагог-устозлар ҳамда Азимобод маҳалласи аҳолиси иштирокида катта тадбир бўлиб ўтди. Вилоят раҳбари ушбу ҳайрли ишнинг бошида туруганлар, қурилиш, хашар ишларида қатнашганлар ва хомийларга миннатдорчилик билдириб, "Мактаб қурган, таълим ривожига хисса қўшган ҳар бир инсон хурмат ва эҳтиромга тўлиқ муносибдир. Келажакда бу мактабдан Юртбошимиз таъкидлаганидек, Учинчи Ренесанс асосчилари бўлган ўғил-қизларимиз етишиб чиқишига тилакдошмиз!" - дея таъкидлади. Тадбир давомида бир гуруҳ фидоий инсонларга вилоят ҳокимлигининг ташаккурномалари, эсталик совғалари топширилди. МФЙ раиси А.Мираминов бутун азимободликлар номидан янги мактаб учун раҳмат айтди. Олтиариқ туман ҳокимлиги Ахборот хизмати.