1. Бош сахифа
2. Янгиликлар

ХОРАЗМЛИКЛАР ОЛТИАРИҚ ТАЖРИБАСИНИ ЎРГАНМОҚДА

×

Хоразм вилояти ҳокимининг ўринбосарлари Мурод Очилов ва Комилжон Сабиров бошчилигида Шовот, Қўшкўпир, Янгибозор, Боғот ва Янгиариқ туманлари ҳокимлари Олтиариқ туманида бўлдилар

Меҳмонлар туманда боғдорчилик ва узумчилик соҳаларини ривожлантириш бўйича амалга оширилаётган ишлар, хусусан, тумандаги минг гектар адирликда ташкил этилган узумчилик ва боғдорчилик плантацияси билан танишдилар.

Авваллари бу жой ҳеч нарса экилмаган қуруқ ерга  сув таъминоти етарли йўлга қўйилгани, тик суғориш қудуқлари қазилгани, сув ҳовузлари барпо этилгани, томчилаб суғориш тизими жорий этилиб насослар ўрнатилгани ва электр тармоғи тортилгани делегация иштирокчиларида катта таассурот қолдирди.

Ўзлаштирилган майдонларнинг 560 гектарида бетон устунлар ўрнатилиб, токзор барпо этилди, “хусайни”, “келинбармоқ”, “ризамат”, “кишмиш” каби харидоргир узум навлари экилди. Бу узумзорлар аҳолига 25 сотихдан 25 миллион сўмлик 7 йиллик имтиёзли кредит асосида бўлиб берилмоқда. 300 гектарлик интенсив боғда эса олма, гилос, ўрик кўчатлари ўтқазилмоқда. Қатор ораларига тарвуз экилган. Бозор талабига қараб, қалампир, булғор қалампири, бодринг, кўкатлар ва бошқа полиз маҳсулотлари етиштирилаётгани хоразмликларда катта қизиқиш уйғотди.

Хоразм вилояти ҳокимининг ўринбосарлари Комилжон Сабировнинг таъкидлашича, ўзлаштирилмаган ерларни ўзлаштириш, Олтиариқ тажрибасини Хоразмда оммалаштириш ва деҳқончиликдаги катта тажрибани ўрганиш мақсад қилинган мазкур ташрифдан делегация иштирокчилари бир қатор маълумотларга эга бўлдилар.

Бизни ижтимоий тармоқларда кузатинг
Facebook | Telegram | Telegram murojaat